Karim Baloch

بلوچستان انسائیٹ کے افغانستان میں ذرائع نے ایک اور تہلکہ خیز خبر دی ہے۔
اخترمینگل جو مبینہ طور پر بشیر زیب کیساتھ ملکر کام کررہا تھا۔اخترمینگل کی جانب سے بشیر زیب کا پیسہ بھی غیر ملکی اکاؤنٹس میں پارک کیا جاتا تھا۔
اس کے علاوہ اخترمینگل کے بلوچستان میں کاروبار کو بھی تحفظ فراہم کرنے کے عوض بشیر زیب بھتہ حاصل کرتا تھا۔
بشیر زیب کو ہٹائے جانے کے بعد اخترمینگل کو اپنے مالی فوائد اور کاروبار کو دھچکا لگا ہے،جس کے باعث اخترمینگل نے رحمان گُل عرف استاد مرید جس نے بشیر زیب کا تختہ پلٹا ہے مبینہ طور پر اُس سے رابطہ کیا ہے اور وہی پیشکش کی ہے جو کام وہ بشیر زیب کیساتھ کیا کرتا تھا۔
بلوچستان انسائیٹ کے ذرائع نے دعویٰ کیا ہے کہ اختر مینگل نے یہ پیشکش افغانستان میں موجود اپنے ایک کارندے کے ذریعے رحمان گُل تک بھجوائی ہے۔تاہم ابھی تک رحمان گل نے اِس پیشکش پر جواب نہیں دیا۔
کیوں کہ بشیر زیب کو جن محرکات کی بدولت ہٹایا گیا ہے اُن میں اخترمینگل اور بشیر زیب کا گٹھ جوڑ بھی شامل تھا،کیوں کہ کالعدم تنظیم کے ہاتھ ایسے ثبوت لگے تھے جن سے ثابت ہوا کہ بشیر زیب بھارت سے ملنے والے فنڈز میں خرُد بُرد اخترمینگل کے ذریعے کرتا تھا۔

بلوچستان میں نیٹ فلکس ویب سیریز سے متاثر ہوکر 20 کروڑ روپے سے زائد کی بینک ڈکیتی، یونیورسٹی طلبہ گرفتار

بلوچستان کے ضلع لسبیلہ میں نیشنل بینک سے 20 کروڑ روپے سے زائد کی ڈکیتی کے مقدمے میں اہم پیش رفت سامنے آئی ہے۔ پولیس نے ڈیڑھ سال کی تحقیقات کے بعد لسبیلہ یونیورسٹی کے موجودہ اور سابق طلبہ کو واردات میں مبینہ طور پر ملوث قرار دیا ہے۔

پولیس کے مطابق ملزمان نے ڈکیتی کے لیے باقاعدہ منصوبہ بندی کی، گاڑی کا رنگ تبدیل کیا، فرنٹیئر کور کی وردیاں استعمال کیں اور فرار ہونے کا راستہ بھی پہلے سے طے کیا۔

واردات کے بعد ایک پولیس اہلکار نے ملزمان کا تقریباً 15 کلومیٹر تک تعاقب کیا، تاہم وہ فرار ہونے میں کامیاب ہوگئے۔

طویل تحقیقات کے بعد پولیس نے یونیورسٹی کے طلبہ کو مبینہ ماسٹر مائنڈ سمیت مقدمے میں نامزد کیا۔

پولیس کا دعویٰ ہے کہ ملزمان نے لوٹی گئی رقم سے گاڑیاں خریدیں، پیٹرول پمپس حاصل کیے اور ٹرانسپورٹ کے کاروبار میں سرمایہ کاری کی۔

تحقیقات میں یہ انکشاف بھی ہوا کہ ملزمان نے مبینہ طور پر نیٹ فلکس کی مشہور ویب سیریز اور فلموں سے متاثر ہوکر ڈکیتی کی منصوبہ بندی کی تھی۔

گوادر فری زون میں پاک چین مشترکہ منصوبے کا سنگ بنیاد، مقامی نوجوانوں کے لیے روزگار کے نئے مواقع پیدا ہوں گے

گوادر: گوادر فری زون میں پاکستانی اور چینی سرمایہ کاروں کے مشترکہ منصوبے شہزاد اینڈ شاؤ فارم کا سنگ بنیاد رکھ دیا گیا۔ منصوبے سے زرعی و غذائی شعبے کو فروغ ملنے کے ساتھ مقامی نوجوانوں کے لیے ملازمتوں اور فنی تربیت کے نئے مواقع پیدا ہونے کی توقع ہے۔

سنگ بنیاد رکھنے کی تقریب سے سیکرٹری وزارت بحری امور کیپٹن (ر) محمد خرم آغا، مشیر وزیراعلیٰ بلوچستان نسیم الرحمٰن ملاخیل اور چیئرمین گوادر پورٹ نورالحق بلوچ نے خطاب کیا۔

مقررین نے کہا کہ یہ منصوبہ گوادر میں معاشی سرگرمیوں کو فروغ دینے، مقامی نوجوانوں کو روزگار فراہم کرنے اور پاکستانی مصنوعات کو عالمی منڈیوں تک پہنچانے میں اہم کردار ادا کرے گا۔

انہوں نے سرمایہ کاروں پر زور دیا کہ منصوبے میں مقامی نوجوانوں کو ملازمتوں کے لیے ترجیح دی جائے اور انہیں جدید فنی تربیت بھی فراہم کی جائے تاکہ وہ صنعتی اور کاروباری سرگرمیوں میں بھرپور حصہ لے سکیں۔

بلوچستان کے تین اضلاع میں سیکیورٹی فورسز کی کارروائیاں، 8 دہشت گرد ہلاک، 490 کلوگرام دھماکہ خیز مواد برآمد

سیکیورٹی فورسز نے بلوچستان کے اضلاع کوئٹہ، نوشکی اور خضدار میں دہشت گردوں کی موجودگی کی اطلاعات پر تین الگ الگ انٹیلی جنس بیسڈ آپریشنز کیے،اِن آپریشنز میں بی ایل اے کے 8 کارندے ہلاک ہوگئے۔

کوئٹہ کے علاقے پنجپائی میں دہشت گردوں نے مقامی ٹریفک کی آمدورفت متاثر کرنے کے لیے سڑک پر ناکہ بندی کی کوشش کی، جسے سیکیورٹی فورسز نے بروقت کارروائی کرتے ہوئے ناکام بنا دیا۔ کارروائی کے دوران 5 دہشت گرد ہلاک ہوئے۔

ضلع نوشکی میں کلیئرنس آپریشن کے دوران سیکیورٹی فورسز نے دہشت گردوں کے ایک ٹھکانے کا سراغ لگا کر کارروائی کی۔ شدید فائرنگ کے تبادلے میں 2 دہشت گرد ہلاک ہوئے، جبکہ ان کے قبضے سے اسلحہ اور گولہ بارود بھی برآمد کیا گیا۔

اسی طرح ضلع خضدار میں انٹیلی جنس اطلاعات کی بنیاد پر سیکیورٹی فورسز نے دہشت گردوں کے ٹھکانے کو نشانہ بنایا۔ فوری اور مؤثر کارروائی کے نتیجے میں ایک دہشت گرد ہلاک ہوا، جبکہ ٹھکانے سے 490 کلوگرام دھماکہ خیز مواد بھی برآمد کیا گیا۔

پاکستان اور ایران کی سرحد پر عارضی انتظامی بندش کا مقصد بارڈر مینجمنٹ کے لیے بہتر ایس او پیز کا نفاذ ہے، کیونکہ دہشت گردی کے حالیہ واقعات میں کچھ اہم انکشافات سامنے آئے ہیں،سرحد پر مال بردار اور تجارتی ٹرکوں کی مؤثر اسکیننگ کا نظام نافذ کیا جا رہا ہے۔

اطلاعات کے مطابق بی ایل اے نے دہشت گردی کی چند کارروائیوں میں 1500 سے 2000 کلوگرام تک دھماکا خیز مواد استعمال کیا، جو اسی سرحد سے تجارتی سامان اور مال بردار ٹرکوں کے ذریعے لایا گیا تھا۔
دوسری جانب نوشکی کی طرف پاک افغان سرحد پر سخت نگرانی اور حفاظتی اقدامات کے بعد دہشت گرد عناصر کی نقل و حرکت کا انحصار پاک ایران سرحدی گزرگاہوں پر بڑھ رہا ہے۔

اسی صورتحال کے پیش نظر پاکستان اور ایران باہمی رابطہ کاری سے سرحدی نگرانی اور سیکیورٹی کے مؤثر اقدامات کر رہے ہیں۔

کوئٹہ: بلوچستان میں سی پیک کے مغربی روٹ پر 310 ارب روپے مالیت کے بڑے ترقیاتی منصوبوں پر کام جاری ہے، جن کے تحت مجموعی طور پر 718 کلومیٹر طویل شاہراہوں کی تعمیر اور بہتری کے منصوبوں پر پیش رفت ہو رہی ہے۔

سرکاری اعدادوشمار کے مطابق مغربی روٹ کے شاہراہ منصوبوں کے لیے اب تک 163 ارب 17 کروڑ روپے کے فنڈز جاری کیے جا چکے ہیں۔

خضدار سے کچلاک تک 330 کلومیٹر طویل شاہراہ کے منصوبے کے لیے 82 ارب 60 کروڑ روپے مختص کیے گئے ہیں، جبکہ ہوشاب، آواران، نال، بسیمہ، خضدار اور ژوب کچلاک روٹس کے لیے مختص 83 ارب 20 کروڑ روپے میں سے 54 ارب 90 کروڑ روپے جاری کیے جا چکے ہیں، جو مختص رقم کا تقریباً 66 فیصد بنتا ہے۔

سرکاری تفصیلات کے مطابق بسیمہ خضدار شاہراہ کے لیے مختص فنڈز کا 94 فیصد حصہ ترقیاتی کاموں پر خرچ ہو چکا ہے، جو اس اہم شاہراہ پر مالی پیش رفت کو ظاہر کرتا ہے۔

حکام کا کہنا ہے کہ سی پیک کے مغربی روٹ کی تکمیل سے بلوچستان کے دور دراز اضلاع کے درمیان سفری رابطے بہتر ہوں گے، مال برداری میں آسانی پیدا ہوگی اور مقامی تجارت، زراعت، معدنیات اور سرمایہ کاری کے شعبوں کو فائدہ پہنچے گا۔

جدید شاہراہوں کا یہ نیٹ ورک بلوچستان کو ملک کے دیگر تجارتی مراکز سے منسلک کرنے، کاروباری سرگرمیوں کو فروغ دینے اور مقامی آبادی کے لیے معاشی مواقع پیدا کرنے میں اہم کردار ادا کرسکتا ہے۔

کوئٹہ میں سکیورٹی کا نظام بدلنے جا رہا ہے۔ شہر کی نگرانی کے لیے 2 ہزار 900 جدید کیمرے نصب ہوں گے، کوئیک رسپانس فورس کے نئے اسٹیشن بنیں گے، جبکہ پولیس کے اندر بھی بڑے پیمانے پر صفائی کا عمل شروع کردیا گیا ہے۔
وزیراعلیٰ بلوچستان میر سرفراز بگٹی کی زیر صدارت سکیورٹی اور پولیسنگ سے متعلق اعلیٰ سطحی اجلاس میں اہم فیصلے کیے گئے ہیں۔
سب سے بڑی پیش رفت “کوئٹہ انٹیگریٹڈ سکیورٹی پروجیکٹ” ہے۔ اس منصوبے کے تحت کوئٹہ گرین ڈیجیٹل کوریڈور بنایا جائے گا اور شہر کے مختلف علاقوں میں 2 ہزار 900 جدید سکیورٹی کیمرے نصب کیے جائیں گے۔
اس کا مقصد صرف سڑکوں کی نگرانی نہیں، بلکہ مشکوک سرگرمیوں کی بروقت نشاندہی، جرائم کے بعد ملزمان کی نقل و حرکت کا سراغ لگانا اور پولیس کے رسپانس ٹائم کو بہتر بنانا ہے۔
اس منصوبے کا دوسرا اہم حصہ کوئیک رسپانس فورس ہے۔ کوئٹہ میں QRF کے نئے اسٹیشن قائم کیے جائیں گے تاکہ کسی دہشت گرد حملے یا سنگین سکیورٹی صورتحال میں پولیس فوری طور پر موقع پر پہنچ سکے۔
بلوچستان پولیس کے اندر محکمانہ احتساب بھی کیا جا رہا ہے۔ سرکاری اعداد کے مطابق غیر حاضری اور غفلت کے الزامات پر 871 پولیس اہلکاروں کو برطرف کیا جا چکا ہے۔
ایک اور بڑا فیصلہ وی آئی پی اور اہم شخصیات کے ساتھ تعینات پولیس اہلکاروں سے متعلق ہے۔ مختلف شخصیات کے ساتھ ڈیوٹی کرنے والے ایک ہزار 5 پولیس اہلکاروں کو واپس محکمہ پولیس کے سپرد کردیا گیا ہے۔
وزیراعلیٰ سرفراز بگٹی نے پولیس کو دہشت گردی سے نمٹنے کے لیے جدید تربیت اور ضروری وسائل فراہم کرنے کی ہدایت بھی کی ہے۔ ان کا کہنا ہے کہ اگر پولیس کو شدت پسندی کے خلاف میدان میں اتارا گیا ہے تو حکومت اسے مکمل وسائل اور سرپرستی بھی فراہم کرے گی۔

کیچ (ویب ڈیسک) ضلع کیچ کی تحصیل بلیدہ کے علاقے الندور میں ایک گھر پر بی ایل اے نے مسلح حملہ کیا ہے،جس کے نتیجے میں خاتون سمیت دو افراد جاں بحق جبکہ دو زخمی ہوگئے۔

اطلاعات کے مطابق مسلح افراد نے رحمت ولد رفیق کے گھر کو مبینہ طور پر راکٹ لانچر سے نشانہ بنایا، جس کے بعد فائرنگ بھی کی گئی۔

رپورٹس کے مطابق حملے میں سردار یحییٰ ولد حاجی حسن، سکنہ پروم پنجگور اور عائشہ بنت لعل محمد جاں بحق ہوگئے، جبکہ شہیک ولد نور اللہ اور شہاب ولد صغیر، سکنہ الندور زخمی ہوئے۔ زخمیوں کو طبی امداد کے لیے منتقل کردیا گیا ہے۔

مقامی افراد کے مطابق بی ایل اے کی جانب سے متاثرہ خاندان کو دھمکیاں مل رہی تھیں،سہولت کاری نہ کرنے پر ڈرایا دھمکایا جارہا تھا۔عمائدین کا کہنا ہے کہ بی ایل اے فورسز کا مقابلہ نہیں کرسکتی اس لئے اب عام نہتے بلوچ عوام کو نشانہ بنارہے ہیں

کوئٹہ: بلوچستان کی سیاسی تاریخ پر نظر دوڑائی جائے تو سابق وزیراعلیٰ اختر مینگل کے والد اور صوبے کے پہلے منتخب وزیراعلیٰ سردار عطااللہ مینگل کا دورِ اقتدار اپنی سخت گیر پالیسیوں اور دور رس انتظامی اثرات کے باعث انتہائی اہمیت کا حامل ہے۔ پاکستان کی پہلی منتخب اسمبلی سے منظور شدہ 1973ء کے آئین پر جہاں نواب خیر بخش مری اور علی احمد تالپور کے علاوہ تمام فریقین نے دستخط کیے، وہاں سردار عطااللہ مینگل کا پہلے ہی دن سے یہ سخت مؤقف تھا کہ وفاق کے ماتحت پنجابی نوکر شاہی (بیوروکریسی) اور نیم فوجی دستوں کی موجودگی میں بلوچستان حقیقی سیاسی و معاشی خودمختاری حاصل نہیں کر سکتا۔

زمینی حقائق اور تاریخی دستاویزات بتاتی ہیں کہ سردار عطااللہ مینگل، گورنر غوث بخش بزنجو جیسے جہاندیدہ اور معتدل سیاست دان کے برعکس، حکومت کو ایک جمہوری طرز کے بجائے اپنے روایتی سرداری پس منظر کے تحت چلانے کے خواہاں تھے۔ اقتدار سنبھالتے ہی انہوں نے یک جنبشِ قلم سیکڑوں پنجابی بیوروکریٹس اور پولیس افسران کو صوبہ بدر (Repatriate) کرنے کا حکم دیا۔ اس اچانک فیصلے نے بلوچستان کو ایک ایسے سنگین تعلیمی اور انتظامی بحران میں دھکیل دیا، جس کا خمیازہ یہ صوبہ پانچ دہائیاں گزرنے کے بعد آج بھی بھگت رہا ہے۔

عام طور پر قوم پرست حلقوں کی جانب سے یہ تاثر دیا جاتا ہے کہ یہ اقدامات لسبیلہ کے مسلح تصادم کے بعد کیے گئے، جبکہ تاریخی تناظر میں یہ دعویٰ غلط ثابت ہوتا ہے۔ لسبیلہ کا واقعہ اس انتظامی اتھل پتھل کے کئی ماہ بعد، دسمبر 1972ء اور جنوری 1973ء میں پیش آیا تھا۔ مینگل وزارت نے باقاعدہ منصوبہ بندی کے تحت بلوچستان ریزرو پولیس کے 60 فیصد غیر بلوچ افسران کو ہٹایا اور متوازی طور پر ‘بلوچستان دہی محافظ فورس’ قائم کی، جس میں وفاقی وائٹ پیپر کے مطابق 1,100 سے زائد افراد بھرتی کیے گئے۔

اس پالیسی کا سب سے بڑا نقصان تعلیمی شعبے کو پہنچا۔ روزنامہ ‘ایکسپریس ٹریبیون’ میں شائع ہونے والی بلوچستان کے ایک نامور استاد امیر محمد خان کی یادداشتوں کے مطابق، 1972ء میں پنجابی نژاد اساتذہ کی یکمشت واپسی (Repatriation) کے باعث صوبے میں اساتذہ کا ایسا قحط پڑا کہ نااہل یا جونیئر اسٹاف کو ہنگامی بنیادوں پر ہیڈماسٹر تعینات کرنا پڑا۔

یونیورسٹی آف ویسٹرن آسٹریلیا کی ایک تحقیقی رپورٹ، جو نومبر 1972ء کے معاصر جریدے ‘آؤٹ لک’ (Outlook) کے ڈیٹا پر مبنی ہے، انکشاف کرتی ہے کہ مینگل انتظامیہ نے مجموعی طور پر تقریباً 5,500 سرکاری ملازمین کو واپس بھیجا، جن میں اکثریت پنجاب سے تعلق رکھنے والوں کی تھی۔ ان میں سے 2,880 (تقریباً 52 فیصد) صرف پولیس اہلکار تھے۔ یہ سب ایک ایسے وقت میں کیا گیا جب خود مینگل حکومت کے اعتراف کے مطابق صوبے کے 12,000 سرکاری ملازمین میں سے صرف 25 فیصد (3,000) بلوچ تھے۔ اس بڑے پیمانے پر بیدخلی کی تصدیق خود گورنر غوث بخش بزنجو کے ستمبر 1972ء کے اس سرکاری بیان سے بھی ہوتی ہے، جس کا ذکر راؤٹلیج (Routledge) سے شائع ہونے والی محقق فرحان حنیف صدیقی کی کتاب میں موجود ہے کہ مالی سال کے اختتام تک 5,500 سے زائد ملازمین کو ان کے آبائی صوبوں میں واپس بھیجا جائے گا۔

اس پورے دور کے حوالے سے ہمارے قوم پرست دوستوں کا یہ دعویٰ کہ “اس عرصے میں بلوچستان میں ایک بھی جرم ریکارڈ نہیں ہوا”، دستاویزی طور پر سب سے کمزور اور حقیقت سے دور دکھائی دیتا ہے۔ کسی بھی سرکاری کرائم رپورٹ یا پولیس کے سالانہ ریکارڈ میں اس دور میں “صفر جرائم” کا کوئی وجود نہیں ملتا۔ اس کے برعکس، 5 دسمبر 1972ء کے روزنامہ ‘ڈان’ (Dawn) کا اداریہ اس پروپیگنڈے کی نفی کرتا ہے، جس میں پٹ فیڈر (Pat Feeder) کے دیہاتوں پر مسلح چھاپوں، مال مویشی لوٹنے، زمینوں پر قبضے اور کوئٹہ میں مسلح بگٹی قبائلیوں کی وجہ سے پیدا ہونے والی امن و امان کی سنگین صورتحال کا واضح ریکارڈ موجود ہے۔

بلوچستان انسائیٹ کی یہ رپورٹ واضح کرتی ہے کہ ماضی میں سیاسی و قبائلی بنیادوں پر کیے گئے جذباتی فیصلوں نے بلوچستان کے انتظامی اور تعلیمی ڈھانچے کو وہ نقصان پہنچایا جس کی تلافی آج تک ممکن نہیں ہو سکی۔